Saga – Ísfélag hf.

Mynd: Gísli Eyjólfsson

FÉLAG UM FROSTHÚS

Árið 1896 bjuggu í Vestmannaeyjum innan við 600 manns. Línuöldin svokallaða skall hratt á og nú vildu allir eignast línu, sem áður hafði verið fordæmd. Helsta beitan á línu var gota, ýsa og langa. Síldin, hin mikla tálbeita, var ekki til taks enda erfitt að geyma hana þar sem engin voru frosthúsin. Skipshafnir byggðu sér kofa úr torfi og grjóti og söfnuðu þar snjó og ís á veturna. Í þessum kofum var síldin geymd, ef hún bauðst. Um aldamótin mátti finna slíka kofa víðs vegar um Heimaey. Hins vegar var lítið um snjó á veturna þá sem nú og höfðu menn oft mikið fyrir að afla hans og færa í kofana. Mönnum varð því fljótlega ljóst að beitugeymslur sem þessar voru ekki líklegar til árangurs til lengri tíma. Íshús, líkt og víða þekktust, þyrftu Eyjamenn að eignast.

Sunnudaginn 15. september 1901 var haldinn almennur fundur í kauptúninu þar sem umræðuefnið var bygging íshúss. Fundurinn var vel sóttur og létu menn í ljós mikinn áhuga á málinu. Eftir nokkra umræðu gáfu sig fram 45 fundarmenn sem reiðubúnir voru að leggja fram hlutafé til stofnunar hlutafélags um íshúsið. Fór svo að samtals safnaðist hlutafé upp á 1.400 krónur. Kosin var fimm manna nefnd til að undirbúa stofnun félagsins og kynna sér gerð íshúsa. Voru það merkir menn samtímans sem komu þar að; Magnús Jónsson, Sigurður Sigurfinnsson, Gísli Lárusson, Magnús Guðmundsson og Árni Filippusson.

Þann 1. desember var boðað til stofnfundar þar sem samþykkt voru lög félagsins, teikningar,
og kostnaðaráætlun íshússins og fyrsta stjórn félagsins kosin. Í hana voru kosnir; Þorsteinn
Jónsson héraðslæknir, Árni Filippusson bókari, og Gísli J. Johnsen verslunarmaður. Varamaður var Magnús Guðmundsson útvegsbóndi.

1901

Ísfélag Vestmannaeyja hf. stofnað 1. desember.

1902

Íshús byggt, 220 m³ að stærð.

Menn að störfum í íshúsi í Reykjavík. Mynd: Magnús Ólafsson

1903

Högni Sigurðsson ráðinn sem íshússvörður. Ís og snjó safnað í þegnskylduvinnu. Geymsla á afla, auk beitu, hafin í húsinu.

Högni Sigurðsson, bóndi á Heiði var fyrsti starfsmaður Ísfélagsins, íshússtjóri í hlutastarfi. Hann var fyrsti vélstjóri á Íslandi sem keyrði frystivél og fór til Danmerkur og lærði þau fræði á ótrúlega skömmum tíma. Högni starfaði hjá Ísfélaginu til ársins 1928.

1904

Vanhöld á greiðslum fyrir beitusíld, rekstur félagsins erfiður. Snjókofi byggður. Gísli J. Johnsen kjörinn formaður stjórnar.

1905

Erfiðleikar við útvegun beitusíldar og rekstrarörðugleikar.

1906

Formanni stjórnar falið að kanna kaup á kælivél.

1907

Félagsstarfið í lægð, en haldið áfram útvegun beitusíldar. Aðalfundur samþykkti að kaupa frystivél og byggja nýtt frystihús.

1908

Nýtt frystihús tók til starfa um áramótin og var fyrsta vélknúna frystihús á Íslandi. Aflvélar gasknúnar.

1909

Félagið mjög skuldugt. Gísli J. Johnsen felldur úr stjórn, þrátt fyrir að hafa borið uppi reksturinn.

1910

Ný lög samþykkt á aðalfundi. Ný stjórn kosin. Ákveðið að hefja kjötverslun.

1912

Gísli J. Johnsen tekinn í sátt og gerður að formanni. Ákveðið að bæta vélakost og stækka frystihúsið.

1914

Félagið ákveður að hætta að geyma kjöt, fisk og önnur matvæli fyrir almenning. Opnuð kjötverslun.

1915

Átakamikill félagsfundur og þrír stjórnarmenn segja af sér. Ákveðið að raflýsa byggingar félagsins með rafmagni frá Rafveitu Vestmannaeyja. Metár í sölu beitusíldar, 153 smálestir.

1920

Fyrsta olíuknúna aflvélin sett upp í frystihúsinu.

1922

Stjórn heimilað að taka lán til að endurbæta frystihús og vélbúnað.

1923

Um 70 vélbátar gerðir út frá Eyjum.

1924

Gísli J. Johnsen mælir fyrir því á félagsfundi að formenn báta og útgerðarmenn gefi fé í sjóð til að byggja sjúkrahús í Vestmannaeyjum. Það varð að veruleika þremur árum síðar.

1926

Engar skuldir fást greiddar, mikil fjárhagsvandræði. Útlán á kjöti stöðvuð.

1927

Gísli J. Johnsen segir af sér formennsku. Jón Hinriksson, kaupfélagsstjóri, kosinn formaður.

Gísli J. Johnsen var formaður Ísfélagsins á upphafsárum þess og átti drjúgan þátt í vexti Ísfélagsins á fyrstu áratugum þess og lánaði því oft og tíðum stórfé úr eigin sjóðum. Hann lét af formennsku árið 1927.

1930

Vélbátar á vertíð nær 100. Ákveðið að stækka frystihúsið um 220 m2. Járnvinda keypt til að lyfta frosinni síld úr kjallara upp á götuhæð.

1931

Félagið tekur við lifur upp í beituskuldir. Tvö ný íshús rísa í samkeppni við Ísfélagið.

1932

Ísfélagið tekur þátt í stofnun Sölusambands íslenskra fiskframleiðenda (SÍF).

1933

Á vetrarvertíð nemur beitusala um fimm tonnum á dag. Miklir rekstrarerfiðleikar vegna kreppu og ógreiddra skulda. Málaleitan enskra aðila um kaup á eignum félagsins hafnað. Jóhannes Brynjólfsson ráðinn framkvæmdastjóri.

1935

Á vertíðinni skiptu 54 bátar við félagið. Enginn fékk keypta beitu sem ekki stóð í skilum eða setti veð.

1937

Lagt á ráðin um kaup á stækkun frystihússins og kaup á hraðfrystitækjum sem anni 5 tonnum á sólarhring.

1938

Bygging hafin á nýju húsi.

Hraðfrystistöð Vestmannaeyja (Hraðið) tilkynnt til firmaskrár. Heilfrysting á fiski hafin.

1939

Ný stjórn kjörin og Tómas M. Guðjónsson verður formaður. Þessi stjórn sat óbreytt í áratug og reyndist mjög dugmikil.

Hraðið byrjar að flaka og frysta fisk í frystihúsi Vöruhússins. Í fyrsta skipti sem það var gert í Eyjum.

1940

Byrjað að heilfrysta fisk hjá Ísfélaginu. Á næstu fimm árum eru miklar breytingar á hafnarsvæðinu. Ísfélagið fær stærri lóð við höfnina.

Hraðfrysting og flökun hefst hjá Hraðinu í nýjum húsakynnum, fyrrum Garður og Godthaab.

1942

Ísfélagið meðal stofnenda Sölumiðstöðvar hraðfrystihúsanna og fær auðkennið H-2.

1946

Hafist handa við byggingu nýs hraðfrystihúss.

1947

Fyrsti áfangi nýja hússins kominn í notkun. Byggingu haldið áfram og keypt nýtt kælikerfi í frystihúsið.

1950

Stórbruni í húsakynnum Hraðsins.

Úrklippa úr Morgunblaðinu þriðjudaginn 10. janúar 1950.

Kjöt- og nýlenduvöruverslun Ísfélagsins um 1950.

1954

Fyrst hreyft við hugmynd um byggingu verbúðar.

1956

Tímamót urðu á aðalfundi þetta ár. Útgerðarmenn tíu báta gengu til liðs við félagið og lögðu fram 150 þúsund króna hlutafé á hvern bát. Ný stjórn kjörin, Magnús Bergsson stjórnarformaður. Einar Sigurjónsson ráðinn framkvæmdastjóri.

Einar Sigurjónsson fæddist 7. janúar 1920 í Vestmannaeyjum. Hann var vélstjóramenntaður og nam einnig við Íþróttaskólann í Haukadal árið 1939. Hann tók minna fiskimannaprófið við Stýrimannaskólann í Reykjavík árið 1943. Í upphafi reri Einar til sjós hjá öðrum útgerðum sem vélstjóri en réðist í bátskaup með félögum sínum árið 1945. Þeir stunduðu útgerð og fiskverkun til ársins 1956, er Einar hóf störf hjá Ísfélagi Vestmannaeyja. Hann
sat einnig í stjórnum nokkurra fyrirtækja tengdum sjávarútvegi, lengst þó í stjórn Sölumiðstöðvar Hraðfrystihúsanna. Einar lést árið 1998. Maki hans var Hrefna Sigurðardóttir.

BYLTINGIN ÁRAMÓTIN 1956-1957
Eftir mikilvægt starf við eflingu fjárhags félagsins var á aðalfundi rétt fyrir áramótin 1956/1957 ákveðið að skipta út stjórn félagsins að mestu leyti. Félagið hafði fyrir það lagt í miklar fjárfestingar í tækjum og vélum, en allt hráefni vantaði til vinnslunnar. Einar Sigurjónsson var beðinn um að taka forystu sem framkvæmdastjóri Ísfélagsins af nýrri stjórn félagsins í lok árs 1956 og sinnti því starfi til ársins 1987. Hann varð einnig varaformaður stjórnar árið 1963. Verkefnin voru ekki létt enda hafði Ísfélagið átt í miklum rekstrarerfiðleikum um árabil. Með öflugu starfsfólki, nýjum hluthöfum og undir stjórn Einars tókst að snúa rekstrinum við og var Ísfélagið komið í hóp öflugustu
sjávarútvegsfyrirtækja á landinu örfáum árum síðar.

Ráðning Einars sem framkvæmdastjóra Ísfélagsins markaði kaflaskil í rekstri þess og tryggði hann, með miklum sóma, þær grunnstoðir sem Ísfélagið stendur á enn í dag.

Fiskiflökunarvél tekin til notkunar hjá Hraðfrystistöðinni. Sú fyrsta sinnar tegundar á Íslandi.

1957

Hafist handa við auknar byggingarframkvæmdir og endurnýjun tækja og véla. Tómas M. Guðjónsson andast.

1958

Ísfélagið eignast sína fyrstu flökunarvél.

1961

Björn Guðmundsson kjörinn stjórnarformaður.

Björn var fæddur 24. júní 1915 og lést 24. júní 1992, 76 ára að aldri. Björn lauk námi frá Samvinnuskólanum og hóf snemma verslunarrekstur
í Vestmannaeyjum, ásamt því að stunda útgerð og fiskvinnslu. Hann var formaður Útvegsbændafélags
Vestmannaeyja og Bátaábyrgðarfélags Vestmannaeyja. Hann sat í stjórn Ísfélagsins frá árinu 1957. Árið 1960 varð hann stjórnarformaður og gegndi þeirri formennsku í rúm 20 ár. Björn var kvæntur Sigurjónu Ólafsdóttur.
Undir stjórn Björns gekk Ísfélaginu vel og varð farsælt. Hann náði með mikilli ráðsemd að stýra félaginu í gegnum ýmsa erfiðleika, ekki hvað síst í kjölfar eldgossins árið 1973 og þegar uppi voru fjárhags- og rekstrarþrengingar
á áttunda áratugnum, sem leiddu til þess að öllu starfsfólki Ísfélagsins var sagt upp frá og með 1. ágúst 1980, en vinnsla hófst þó aftur 22. ágúst sama ár.

1964

Fiskimjölsverksmiðja Einars Sigurðssonar (FES) tekur til starfa.

1965

Verbúð byggð. Hafin smíði nýs saltfiskvinnsluhúss við Strandveg.

1967

Stórbruni hjá FES, 900 tonn af mjöli eyðileggjast

Mynd: Sigurgeir Jónasson

1969

Hraðfrystistöð Þórshafnar (HÞ) stofnuð 8. júní á grunni Kaupfélags Langnesinga sem átti langa rekstrarsögu á Þórshöfn. Stofnendur eru Þórshafnarhreppur, einstaklingar og útgerðir á Þórshöfn. Félagið byrjar með fiskvinnslu í gamla sláturhúsinu og var unnið í frost.

1970

Ísfélag Vestmannaeyja hf. hæsti skattgreiðandi Vestmannaeyjakaupstaðar.

1973

Eldgos í Heimaey þann 23. janúar. Ísfélagið verður miðstöð björgunarumsvifa og verbúðir og matstofa notaðar fyrir björgunarmenn. Skrifstofa sett upp í Reykjavík. Hraun fer yfir nýjasta hús félagsins og ógnar eldri húsum. Ísfélagið kaupir húseignir Júpiters & Marz hf á Kirkjusandi í Reykjavík og tekur við rekstri þar 1. apríl. Á stjórnarfundi 13. september er samþykkt að félagið fari sjálft út í útgerð, sem er nýmæli í 72 ára sögu. Fiskmóttaka byggð í Þorlákshöfn. Ákveðið að hraða uppbyggingu í Eyjum að loknu gosi.

Brynjar VE 321 siglir framhjá höfuðstöðvum Ísfélagsins að Kirkjusandi í Reykjavík. Mynd: Loftur Ásgeirsson

Gosið veldur altjóni hjá Hraðinu og FES verður fyrir töluverðu tjóni.

Hraðfrystistöð Vestmannaeyja verður hrauninu að bráð 27. mars 1973. Hluti þessa húsnæðis hýsir FES-ið í dag. Mynd: Sigurgeir Jónasson

HÞ kaupir mjölverksmiðju á Þórshöfn sem reist hafði verið á sjötta áratugnum.

1974

Aftur hafin móttaka á fiski í Vestmannaeyjum í janúar. Miklar breytingar gerðar á frystihúsinu í Eyjum. Tvö frystihús í rekstri, í Eyjum og á Kirkjusandi, sem var þá stærsta framleiðslueining í eigu sama aðila í fiskiðnaði hér á landi. Samþykkt að hefja byggingu á nýju saltfiskhúsi. Kirkjusandur seldur Sambandi íslenskra samvinnufélaga.

FES tekur við loðnu til mjölvinnslu eftir gosið í fyrsta sinn þann 2. febrúar. Sigurður Einarson tekur við rekstri Hraðsins.

1975

Ísfélagið gerist aðili að Klakki hf, sameiginlegu félagi frystihúsanna í Eyjum um kaup og útgerð skuttogara. Togari smíðaður í Póllandi. Félagið eignast einnig hlut í Berg-Hugin hf.

1976

HÞ tekur í notkun nýtt og eigið húsnæði fyrir fiskvinnslu.

Jóhann Arngrímur Jóns hóf störf hjá Hraðfrystistöð Þórshafnar sem skrifstofustjóri árið 1976 og tók við sem framkvæmdastjóri tveimur árum síðar. Hann lét af störfum í árslok 2001 eftir 25 ára starf. Jóhann fæddist á Þórshöfn árið 1955 og ólst þar upp. Hann hóf nám í Samvinnuskólanum á Bifröst 1973 og lauk námi árið 1975. Jóhann sat í hreppsnefnd Þórshafnarhrepps 1982-98, sat í hafnarnefnd Þórshafnar um langt árabil og ýmsum fleiri nefndum á vegum bæjarfélagsins og sat á Alþingi fyrir Samtök jafnréttis og félagshyggju 1989-90. Í stjórnartíð Jóhanns skiptust á skin og skúrir í sjávarútvegi. Á þessum árum voru teknar ákvarðanir sem skiptu sköpum við uppbyggingu Þórshafnar og félagsins. Hefðbundin botnfiskvinnsla átti erfitt uppdráttar en uppsjávarvinnsla sótti í sig veðrið með tækniframförum til sjós og lands. Árið 1986 ákvað HÞ að umbreyta fyrirtækinu og taka þátt í þessari þróun. Jóhann er, ásamt fleiri Norðlendingum, frumkvöðull að veiðum Íslendinga í Barentshafi. Þær urðu grunnur að veiðiheimildum þeim í Barentshafi sem Íslendingar hafa í dag.

1977

Saltfiskhúsið stækkað. Togarinn Klakkur VE kemur til landsins.

1978

Ísfélagið kaupir hlut Hugins í Berg- Hugin hf. og eignast 40% hlut í skuttogaranum Vestmannaey VE.

1980

Miklir erfiðleikar. Öllu starfsfólki sagt upp frá og með 1. ágúst. Rekstur hófst aftur í mánuðinum.

1981

Tveir menn farast er þá tók út þegar Heimaey VE 1 fær net í skrúfuna og strandar vestan við Vestmannaeyjar.

Fyrsta loðnan berst til fiskimjölsverksmiðju HÞ á Þórshöfn.

1982

HÞ kaupir ásamt fleiri aðilum skuttogarann Stakfell sem tryggir öruggari hráefnisöflun fyrir frystihúsið. HÞ á þriðjung í togaranum.

1983

Aukin starfsemi hjá HÞ kallar á byggingu til fiskmóttöku og saltfiskverkunar. Saltfiskvinnslan flyst í húsnæði áfast frystihúsinu.

1984

Hellisey VE ferst norðaustur af Heimaey. Fjórir farast en einn skipverji lifði af.

1985

Miklar fjárfestingar hjá Hraðfrystistöðinni á árinu. Skipakaup, breytingar á skipum, nýbygging á frystihúsi, tæki í húsið og kaup á Netagerðinni Ingólfi.

1986

Björn Guðmundsson hættir eftir 30 ára setu í stjórn, þar af sem stjórnarformaður í 25 ár. Kristinn Pálsson tekur við.

HÞ endurnýjar fiskimjölverksmiðjuna með kaupum á notaðri verksmiðju frá Kristjansund í Noregi, eftir það var hún ein sú fullkomnasta á landinu.

1987

Ísfélagið gengur úr Samtogi og fær í sinn hlut togarana Gideon og Halkion. Það er ein stærsta togaraútgerð í Vestmannaeyjum og á auk þess einnig hlut í Bergey VE, Smáey VE og Vestmannaey VE. Hlutafélagið Höfn hf. stofnað um rekstur Halkions og Gideons. Einar Sigurjónsson lætur af störfum hjá Ísfélaginu og Eyjólfur Martinsson ráðinn í hans stað sem framkvæmdastjóri.

Eyjólfur Martinsson, Rósa Martinsdóttir og Einar Sigurjónsson á skrifstofu Ísfélagsins á áttunda áratugnum.
Þegar Einar lét af störfum sem framkvæmdastjóri 1987 tók Eyjólfur við af honum. Eyjólfur hóf fyrst störf hjá Ísfélaginu 1961 og starfaði þar allt til dauðadags við hin ýmsu störf, síðustu árin sem bókari. Eyjólfur lést 17. desember 2011, 74 ára að aldri. l KB

1988

Tunga hf., sem feðgarnir Kristinn Pálsson og Magnús Kristinsson eru aðaleigendur að, eignast stóran hluta í Ísfélaginu. Með hlutafjárkaupum eignast þeir meirihluta.

1989

Höfn hf. rennur saman við Ísfélag Vestmannaeyja hf.

1990

Kristinn Pálsson lætur af formennsku og Magnús sonur hans tekur við. Magnús Bergsson, móðurafi nýja stjórnarformannsins, var stjórnarformaður frá endurskipulagningu félagsins 1956 til dauðadags 1961.

HÞ og útgerðarfélag Norður Þingeyinga sameinast og bætist skuttogarinn Stakfell ÞH 360 við reksturinn.

1991

Gagngerar endurbætur á frystihúsi félagsins. Skrifstofuhald Ísfélagsins og Bergs-Hugins hf. sameinað. Starfsmenn fyrirtækjanna um 170.

1992

1. janúar sameinuðust Ísfélag Vestmannaeyja hf., Bergur-Huginn hf. og Hraðfrystistöð Vestmannaeyja hf. undir nafni Ísfélags Vestmannaeyja hf. Sigurður Einarsson ráðinn forstjóri og Magnús Kristinsson aðstoðarforstjóri. Sameinaða fyrirtækið er eitt það stærsta í sjávarútvegi á Íslandi.

Sameining Hraðfrystistöðvarinnar og Ísfélagsins
Tímamót urðu 1. janúar 1992 þegar hlutafélögin Ísfélagið, Bergur Huginn og Hraðfrystistöð Vestmannaeyja sameinuðust undir merki Ísfélags Vestmannaeyja hf. Þá tók Sigurður Einarsson við sem forstjóri. Hann hafði áður verið forstjóri Hraðfrystistöðvar Vestmannaeyja frá 1975. Ákveðið var að firmamerki nýja félagsins væri skeifurnar sem verið höfðu merki Hraðfrystistöðvarinnar. Við sameininguna varð Ísfélagið eitt stærsta sjávarútvegsfyrirtæki landsins með kvóta sem nam 12.500 þorskígildum og réði yfir tveimur frystihúsum, fiskimjöls- og loðnuverksmiðju, netagerð, frystitogara, þremur ísfisktogurum, sex togskipum og þremur loðnuskipum. Markmið sameiningarinnar var aukin hagkvæmni í veiðum og vinnslu. Þrátt fyrir jákvæðni í byrjun í samstarfi Sigurðar og Magnúsar Kristinssonar, aðstoðarforstjóra, slitnaði upp úr samstarfinu og hóf Magnús rekstur Bergs-Hugins að nýju. Allt var þetta gert í góðu og blómstraði hagur beggja fyrirtækja meira en áður hafði gerst. Mynd: Sigurgeir Jónasson

Frystihúsið flutt frá Strandvegi 28 að Strandvegi 102, í hús Hraðfrystistöðvarinnar. Keypt ný flæðilína og önnur tæki. Þrír bátar og fasteignir seldar.

Félagið hlýtur Coldwater-skjöldinn fyrir gæðaframleiðslu. Björn Guðmundsson fv. stjórnarformaður lést 24. júní.

Magnús Kristinsson og fjölskylda fara úr Ísfélaginu með hlutafélag sitt Tungu hf. og skipin Vestmannaey VE og Smáey VE. Hefur á ný rekstur Bergs-Hugins hf.

1993

Skálar ehf. er stofnað af HÞ ásamt Tanga hf. á Vopnafirði um kaup á ms. Júpiter ÞH 61 ásamt heimildum í loðnu.

1995

Suðurey VE seld og nótaskipið Antares keypt frá Skotlandi. Hlutafé Akureyrarbæjar í Krossanesi hf. keypt.

Við komu Antares VE til Ísfélagsins í apríl 1996. Sigurður Einarsson, Grímur Jón Grímsson, skipstjóri og Magnús Kristinsson. Mynd: Sigurgeir Jónasson

1996

Breytingar gerðar á Sigurði VE og boðin út 1.600 fermetra viðbygging við frystihúsið. Mikið fjárfest í öðrum félögum, t.d. TP-fóðri, Krossanesi, Loðnuvinnslunni, veiðarfæragerðinni Ingvari og Ara, Tryggingamiðstöðinni, Granda og SR mjöli. Eitt besta rekstrarár í sögu félagsins.

HÞ hóf veiðar og vinnslu á kúfskel í samvinnu með bandarískum aðila. Kaupir Öðufell, kúfskelsbát sem sekkur árið eftir. Mannbjörg verður.

1997

Ísfélagið selur hluti sína í SH og SÍF. Keypt 20% hlutafjár í East Greenland Codfish í Grænlandi sem átti loðnuskipið Ammasat og réð yfir 4,2% af sameiginlegum loðnukvóta landanna. Sigurður VE tekinn í lögsögu Noregs, úr verður milliríkjadeila.

Hraðfrystistöð Þórshafnar, í gegnum dótturfélagið Skála, kaupir ms. Neptúnus ÞH 361. Hann er svo seldur árið 2003.

1998

Batnandi afkoma. Vinnsla hefst 28. nóvember í fiskimjölsverksmiðjunni FES eftir gagngera endurnýjun. Einar Sigurjónsson fv. framkvæmdastjóri lést 14. október.

Viðamiklar endurbætur og stækkun á fiskimjölsverksmiðju HÞ.

1999

Viljayfirlýsing um sameiningu Ísfélags Vestmannaeyja, Vinnslustöðvarinnar, Krossaness á Akureyri og Óslands á Hornafirði gefin út 22. ágúst. Vinnslustöðin dró sig út um haustið, en Ísfélagið og Krossanes voru sameinuð.

2000

Ísfélagið og Bergur-Huginn hf. stofna Kap hf., sem kaupir 15% í Vinnslustöðinni. Enn rætt um sameiningu Ísfélags og Vinnslustöðvar.

Sigurður Einarsson forstjóri andaðist 4. október, tæplega 50 ára að aldri. Hann var öllum harmdauði, enda farsæll forystumaður í atvinnulífi og bæjarlífi Vestmannaeyja. Kristinn Pálsson, fv. stjórnarmaður og stjórnarformaður Ísfélagsins, lést sama dag, 74 ára að aldri. Fóru útfarir þeirra Sigurðar fram þann 14. október.

Sigurður Einarsson kom til Vestmannaeyja árið 1974 til að taka við Hraðfrystistöð Vestmannaeyja. Frystihús félagsins hafði farið undir hraun í gosinu og mikið uppbyggingarstarf var því framundan. Það þýddi ekkert að gefast upp, áfram skyldi haldið. Frystihús félagsins var endurreist að Strandvegi 102 þar sem meginstarfsemin fer fram í dag. Einar Sigurðsson, faðir Sigurðar, átti Hraðfrystistöðina en hann rak fyrirtæki um allt land. Hraðfrystistöðin í Vestmannaeyjum og Hraðfrystistöðin í Reykjavík voru þar umsvifamestar. Ágúst, bróðir Sigurðar, tók við Hraðfrystistöðinni í Reykjavík árið 1977 og rak hana þar þangað til hún sameinaðist Granda hf. árið 1990.

Sigurður vann sér strax inn traust og virðingu samferðamanna sinna þrátt fyrir að vera ungur að árum. Hann var mun yngri en aðrir forystumenn í atvinnulífinu á þessum tíma, aðeins 25 ára gamall. Það leið ekki langur tími þangað til hann stóð þeim eldri jafnfætis sem forystumaður í atvinnulífi, hvort sem var í Vestmannaeyjum eða á fastalandinu.

Sigurður lét samfélagið í Eyjum sig miklu skipta og tók þátt í bæði félagsstarfi og bæjarmálum. Hann sat í bæjarstjórn fyrir Sjálfstæðisflokkinn á árunum 1986-1994 og fór aftur í framboð árið 1998 þegar hann leiddi lista Sjálfstæðisflokksins til sigurs. Það hlýtur að vera einstakt fyrir mann, eins umsvifamikinn og Sigurð, að leiða lista stjórnmálaflokks og vinna sigur með tæplega 60% fylgi og fá ekki eina einustu yfirstrikun.

Um áramótin 1991/92 urðu miklar sameiningar í Vestmannaeyjum í kjölfar erfiðleika í sjávarútvegi. Fiskiðjan og Vinnslustöðin sameinuðust undir nafni Vinnslustöðvarinnar og Ísfélagið og Hraðfrystistöðin undir nafni Ísfélags Vestmannaeyja. Sigurður varð forstjóri sameinaðs félags og undir hans forystu komst félagið í gegnum þá erfiðleika sem ríktu í atvinnulífinu í Vestmannaeyjum. Félagið varð öflugt undir hans stjórn og lagður var grunnur að umfangsmiklum fjárfestingum í uppsjávarfiski þó bolfiskurinn væri aldrei langt undan. Félagið á í dag veiðiheimildir í nær öllum tegundum sem veiddar eru á Íslandsmiðum.

Sigurður var dugnaðarforkur, vel skipulagður og nennti ekki að hanga yfir hlutum. Sem formaður bæjarráðs stytti hann fundartímann úr tæpum tveim tímum í 23 mínútur þó ekki bitnaði það á verkefnum ráðsins. Þannig gekk hann til allra verka, fumlaus, skipulagður og reyndi að komast að niðurstöðu. Hann var sanngjarn en um leið málafylgjumaður.

Sigurður var mikill fjölskyldumaður. Hann var kvæntur Guðbjörgu M. Matthíasdóttur, núverandi aðaleigenda Ísfélagsins og saman eignuðust þau fjóra drengi, þá Einar, Sigurð, Magnús og Kristin. Hafa þeir allir unnið hjá félaginu og komið að rekstri þess með einum eða öðrum hætti. Eftir andlát Sigurðar hefur fjölskyldan haldið áfram að byggja félagið upp sem stærstu hluthafar þess. Félagið hefur fjárfest mikið bæði til sjós og lands líkt og glæsileg frystihús og skip bera merki um. Það er í raun ótrúlegt að hugsa til þess hversu miklu Sigurður Einarsson áorkaði á stuttri ævi. Sigurður lést 4. október 2000 eftir stutt veikindi, þá 49 ára.

Eldsvoði lagði frystihús Ísfélagsins í rúst laugardaginn 9. desember. Tjónið metið á um milljarð króna og atvinna 150 manns í fullkominni óvissu. Endurreisnarstarfið hófst þremur dögum síðar.

Mynd: Árni Sæberg

Samherji kaupir rúmlega 31% eignarhlut í HÞ af Þórshafnarhreppi og Landsbanka Íslands. Eignast þar með ráðandi hlut í félaginu.

2001

Ægir Páll Friðbertsson viðskiptafræðingur ráðinn framkvæmdastjóri 1. janúar. Þrátt fyrir gríðarlegt tjón í brunanum í desember 2000 hófst vinnsla á ný réttum mánuði eftir brunann. Frystitogarinn Snorri Sturluson RE keyptur af Granda.

Ægir Páll Friðbertsson, framkvæmdastjóri Ísfélagsins 2001-2010. - Mynd: Óskar Pétur Friðriksson

Hefðbundinni bolfiskvinnslu er að mestu leyti hætt hjá HÞ. Kúfskelveiðiskipið Fossá ÞH 362 kemur til landsins, var smíðað í Kína. Jóhann A. Jónsson hættir sem framkvæmdastjóri HÞ eftir 23 ára farsælt starf. Hann byrjaði sem framkvæmdastjóri 1. ágúst 1978 og lét af störfum í lok árs 2001.

2003

Nýtt öflugt vigtarhús tekið í notkun fyrir fiskimjölsverksmiðju HÞ á Þórshöfn. HÞ kaupir fjölveiðiskipið Þorstein ÞH 360 af Samherja ásamt aflaheimildum. Fiskmarkaður Þórshafnar stofnaður.

2004

Ísfell kaupir Netagerðina Ingólf, sem starfrækt var í Eyjum frá 1947. Félagið kaupir Útgerðarfélagið Ólaf ehf. Meðal eigna félagsins er skipið Grindvíkingur GK sem varð Guðmundur VE 29. Uppbyggingu frystihússins eftir brunann lýkur að mestu.

HÞ kaupir Júpiter frá Færeyjum, verður ÞH 363. Nýtt félag í eigu Þórshafnarhrepps, Svalbarðshrepps, VÍS og Sparisjóðabanka eignast meirihlutann í HÞ.

2005

Í febrúar kaupir Ísfélagið eldri Júpiter ÞH 61 af Hraðfrystihúsi Þórshafnar hf. Í mars var ný flæðilína tekin í notkun í nýjum vinnslusal fyrir bolfisk í frystihúsi.

Kúfskelverksmiðja HÞ er endurnýjuð að mestu leyti frá grunni.

2006

Guðmundur VE sendur í breytingar til Póllands. Hluti af framskipi skipsins brann 16. mars og eyðilagðist m.a. öll vinnslulína skipsins. Samhliða uppbyggingu eftir brunann er vinnsludekkið allt endurskipulagt. Makríll verður fyrst vart sem meðafli við síldveiðar.

Miklir erfiðleikar í rekstri HÞ.

2007

Guðmundur VE 29 kemur til Eyja eftir tíu mánaða endurbætur í Póllandi þar sem skipið var lengt um 12,5 metra og vinnslu- og frystibúnaður endurnýjaður.

Ísfélag Vestmannaeyja kaupir allt hlutafé í Þórshöfn fjárfestingu ehf. sem átti öll hlutabréf í Hraðfrystistöð Þórshafnar hf.

2008

1.250 fm frystigeymsla reist við frystihús félagsins á Þórshöfn. Nýtt bryggjuhús tekið í notkun fyrir löndun á uppsjávarfiski á Þórshöfn. Framleiðslu kúfisks hætt 3. nóvember fyrir Bandaríkjamarkað. Ísfélagið og Skinney-Þinganes stofna sölufyrirtæki um uppsjávarfisk undir nafninu Iceland Pelagic.

2010

Stefán Friðriksson ráðinn framkvæmdastjóri félagsins. Innmötunarkerfi fyrir uppsjávarfisk er endurnýjað á Þórshöfn og kerfi fyrir kassa og bretti sett upp í Vestmannaeyjum.

2012

Heimaey VE 1 kemur til heimahafnar, skipið var byggt í Síle. Samningar um smíði hennar var undirritaður árið 2007. Árið 2010 skók risastór jarðskjálfti landið sem seinkaði komu skipsins. Lokið við byggingu ketilhúss í fiskimjölsverksmiðjunni á Þórshöfn. Lausfrystir fyrir uppsjávarfisk settur upp á Þórshöfn.

2013

Lokið við byggingu hreinsistöðvar í einni af gömlu þrónum í FES. Öll fita og þurrefni nú hreinsuð úr frárennsli frystihússins og eingöngu blóðlitaður vökvi rennur út í sjó. FES og frystihúsið tengd saman með lögnum sem dæla loðnuhrognum í frystihúsið og aukaafurðum í hreinsistöðina í FES.

2014

Útgerðarfyrirtækið Dala-Rafn ehf keypt ásamt togbátnum Dala-Rafni VE 508 og síðar sameinað félaginu. Upphaf samstarfs með Royal Greenland um uppsjávarveiðar við Grænland. Þorsteinn ÞH og Guðmundur VE eru seldir til grænlenska félagsins. Sigurður VE 15 kemur til heimahafnar frá Tyrklandi. Frystiskápum í frystihúsinu í Eyjum fjölgað úr þremur í fimm og nýtt mótorhús byggt við húsið.

Frá undirritun um kaup á útgerðarfyrirtækinu og togbátnum Dala-Rafni árið 2014.
- Mynd: Eyþór Harðarson.

2015

Félagið reisir frystigeymslu og flokkunarstöð við frystihús félagsins í Vestmannaeyjum og allur akstur með fisk um Strandveginn hættir. Félagið kaupir línuútgerðina Jóa Blakk og eignast þar með Litlanes ÞH 3 sem er gert út frá Þórshöfn. Viðamiklar breytingar og endurnýjun á fiskimjölsverksmiðjunni á Þórshöfn, skipt um tvo þurrkara, sjóðara, pressu og fleira. Júpíter ÞH fer til veiða í Máritaníu.

2016

Nýr olíuketill tekinn í notkun í FES.

2018

Ottó N. Þorláksson VE 5 bætist við flota félagsins og kemur í stað Suðureyjar VE 12. Hrognahús endurbyggt á Þórshöfn og þjarkar settir þar upp til að stafla afurðum á bretti. Hæstiréttur dæmir úthlutun ríkisins á makríl ólöglega og viðurkennir bótaskyldu ríkisins. Ísfélagið hefur því sigur í makrílmálinu.

2019

Bolfisklínan í frystihúsinu í Eyjum er uppfærð að miklu leyti með vatnsskurðarvél. Lokið við uppsetningu á sjálfvirkum pokavélum á Þórshöfn.

2020

Fjórir tankar reistir fyrir loðnuhrognavinnslu félagsins í Eyjum og nýttust þeir vel á vertíðinni á eftir. Frystihúsið á Þórshöfn stækkað um 500 fermetra. Ísfélagið fellur frá málsókn vegna skaðabóta í makrílmálinu.

2021

Félagið heldur upp á 120 ára afmæli. Gefið var út veglegt rit um sögu félagsins. Álsey VE 2 kemur til heimahafnar, smíðuð árið 2003 og keypt frá Noregi. Bygging hafin á nýrri hrognavinnslu. Stór loðnuvertíð boðuð 2021/2022 og félagið kaupir sænska uppsjávarskipið Ginneton sem fékk nafnið Suðurey VE 11.

2022

Byrjað á smíði nýrrar starfsmannaðstöðu við frystihúsið á Þórshöfn. Öflug loðnuvertíð var á árinu. Stríð hefst í Úkraínu sem hefur áhrif á sölumarkaði félagsins. Viljayfirlýsing gefin út um samruna Ísfélags Vestmannaeyja hf. og Ramma hf. Eitt besta rekstrarár í sögu félagsins.

2023

Ísfélag Vestmannaeyja og Rammi hf. sameinast í júní. Nafni félagsins er breytt og heitir Ísfélag hf. Við sameininguna bættust við 3 bolfiskskip og öflugur frystitogari við skipastól félagsins ásamt nýjum togara sem er í smíðum. Starfsmannafjöldi fer úr 240 í 380.

2023

Ísfélagið var skráð á aðalmarkað Kauphallarinnar á Íslandi þann 8. desember. Rúmlega 6 þúsund hluthafar bættust þá í eigendahóp félagsins. Fimmföld eftirspurn var í útboðinu sem heppnaðist mjög vel.

2024

Félagið festi kaup á uppsjávarskipinu Pathway í apríl. Seljandi er skoska fyrirtækið Lunar Fishing Company Limited. Pathway var smíðað árið 2017 í Danmörku og er 78 metra langt og 15,5 metra breitt. Kaupin eru liður í endurnýjun á skipaflota félagsins.

2024

Sigurbjörg VE 67 var afhent félaginu í lok ágúst og landaði í fyrsta skipti í Vestmannaeyjum þann 4. október.

2025

Heimaey VE 1 var seld til Andrea L AS í Noregi. Skipið silgdi áleiðis til Noregs til nýrra eigenda þann 7. maí. Heimaey kom ný í flota Ísfélagsins sumarið 2012 frá skipasmíðastöðinni Asmar í Chile og reyndist afar vel á allan hátt þau 13 ár sem hún var í útgerð félagsins.

2025

Ný Heimaey VE 1 kom til hafnar í Vestmannaeyjum þann 31. maí.

Tangagata 1 · 900 Vestmannaeyjar
isfelag [hja] isfelag.is
Skrifstofan er opin kl. 10-12 og 13-15 virka daga

FÉLAG UM FROSTHÚS

fylgdu okkur